黃金燒味 (已結業)

今晚在灣仔收工，行去最近的西隧巴士站諗住坐巴士過海返屋企，喺巴士站見到幾條人龍，其中一條竟然是從一間燒味店排出來的，原來係排隊買外賣。我又唔係太趕時間，咪走去八一八，順便入去食埋個飯，一邊吼實個巴士app，夾啱時間埋單上巴士。一個人食，最好就係叫碟頭飯，於是點了一個 “份量十足碟頭飯套餐”，十幾廿款燒味、鹵味任拼，雙拼都只是$54，跟涼拌小食一份、熱飲或老火湯，絕對抵過嗰啲連鎖快餐店。我素來都唔會待薄自己，所以加了多少少錢upgrade一下今晚個套餐，加了半隻鹹蛋和一碟油菜，飲凍檸茶。另外，老闆娘仲送多一個老火湯俾我飲，好感動動。【青瓜小涼拌】好爽脆。【凍檸茶】味道偏淡，但勝在夠冰凍。【蠔油菜芯】用骨湯浸熟的，所以零捨好味。今晚個【老火湯】佛手瓜豬骨湯，果然係老火湯，好夠火喉。主角始終都係呢個碟頭飯 【叉燒/燒肉飯】+ 半雙鹹蛋。叉燒少少肥，好多蜜汁，邊邊部份少少燶，食落特別香口。傍邊跟咗一碟【黃金芥末】，用來點脆皮燒肉真係絕配。至於鹹蛋啲油份差少少。加咗蜜汁叉燒豉油嘅飯底，非常正!用咗大約半個鐘去完成呢餐飯，睇睇巴士app，時間剛剛好，埋單後，直出門外，就上到西隧巴士，超方便!