Youme Cafe (已結業)

小妹唔係小櫻Fans，但係主題Cafe對於我嚟講都有一種難以抵擋嘅吸引力。是日小妹相約朋友一齊去位於荃灣嘅Youme Cafe，呢間Cafe一向以卡通人物做主題，今期就以兒時回憶「百變小櫻」做主題。一入Cafe，周圍都係小櫻人物嘅蹤影，牆上、桌椅、裝飾、餐牌... ...仲有一排人形紙牌，全部都係打卡位！小妹同朋友一行三人嗌咗三樣嘢食，分別係芝士白汁蕃茄肉醬薯仔長粉（＄６２）、便當盒（分別有飯糰、腸仔、枝豆、玉子燒、煙肉蘆筍卷、草莓、火腿）（＄８８）、芝士漢堡排蕃茄雞肉燴飯拼米紙沙律＋星形薯餅＋章魚燒（＄８２），味道一般，同一般Cafe水準無異，完全冇驚喜位，但賣相還算可以。小妹原以為會有人物造型嘅食物出現，例如基路仔形飯糰呀咁，點知只係以卡通樣米紙取代，令我有啲失望。嘢飲方面，小妹只係嗌咗一杯「雪兔」綠茶（＄３４），熱綠茶配上櫻餅，米紙上有雪兔哥哥嘅樣，製作同樣係有啲Hea。不過呢度有樣好，就係每嗌一樣嘢都會送上一款卡通人物嘅杯墊，作為小櫻粉絲嘅朋友好開心，不過小妹就感覺唔大。