喜悅皇宮 (已結業)

上星期第一次踏足呢個比較偏僻嘅商場時一抬高頭見到有間酒樓，外牆嘅皇宮設計好觸目，忍唔住望多兩眼，走嗰陣留意到入面貼嘅廣告，見價錢都都幾街坊，所以今次同朋友嚟飲下午茶。一到去見酒樓都幾大，人唔算多，好多位，職員叫我哋隨便揀位，好快沖好茶，我哋兩個人叫咗六個點心，一碟炒河，埋單$200有找。點心味道可以，下午茶又唔使同人逼，職員有笑容有禮貌，價錢合理，感覺唔錯。蜜汁叉燒腸，每件都脹卜卜，幾足料，皮都幾滑。鮮竹牛肉球，唔係好有牛肉味，但又唔會醃到好鬆無晒肉嘅口感，口感唔錯。蜂蜜蛋散，每次見到都必點，唔係好多酒樓有，可以再鬆化啲。蘿蔔絲酥，食嘅時候係暖，可能係炸定烘住保溫，外面稍為有少少乾，無入口即溶嘅酥，餡嘅味唔錯，整體都可以。奶黃流沙包，流沙做得好好，唔會太稀，餡甜咗少少，奶皇味重。喜悅蝦餃皇，呢個麻麻，皮同餡好易分開，蝦肉亦唔爽口。乾炒牛肉河，少油，味唔重。