樂湯雞麵館 (庇利金街) (裝修中)

放工明明好好天，出到去同朋友食飯，突然落起大大大雨，無準備之下，趕到去朋友介紹既餐廳，去到望左一眼，今次真係落湯雞了！又會咁岩，餐廳名真係叫樂湯雞，好應景喎。因為朋友未到既關係，所以係門口望左一陣餐牌，睇落好似唔多款，但超級多人食，不停有人出出入入，有一段時間仲要排隊Tim，我就係到行黎行去，留意下入面係食咩，見到好多一煲一煲，越黎越吸引啦！流口水既時候，朋友就係我隔離出現。。。。。入去吧。望一望個餐廳，原來款式唔小既，只係出面冇放曬出黎姐，最近仲有個廚師推介－鮑參翅肚餐－，好似幾特別咁喎！最後因為呢間舖係朋友介紹，所以都係等佢叫啦。首先叫左個砂窩花膠雞湯翅，雞有半隻，雞肉大大件，嫩滑味濃，花膠有好多舊，件件都又厚又大，膠原蛋白勁保身，底下仲有魚翅仔，當然最重點係個湯啦，濃郁鮮甜，難怪人人都叫啦。另外仲叫左兩個－口水豬手－，－蟲草花杞子浸翡翠苗，口水雞見得多，口水豬手第一次聽，好特別，小辣但好香，豬手爽口彈牙，骨膠原好勁，翡翠苗份量好多，爽口清甜，湯底仲係用左雞湯Tim，滿分啦。