雄記美食

營業中

休息中

eat乜牛雜牛腩 | 灣仔碗湯好飲到一滴都冇剩！牛雜米，加牛腩。小編每次去都會咁叫，為的就係個湯底，因為真係好好好好味。好香，好濃郁，飲完一啖好想飲多啖。但係，就算飲哂成碗，都完全無口乾口渴，可見個湯底無味精，係真材實料。「老闆娘，個湯勁好飲，我想問係咪藥材湯嚟㗎？」小編唔識嘢，走咗去問老闆娘。「梗係唔係啦！無落任何藥材！係純粹用牛熬出嚟，係100%牛湯！」老闆娘堅定但非常友善咁回應。佢嗰個笑容有啲似一個呀媽精心炮製咗餐飯俾仔女食嘅感覺。😂個湯汁咁勁，啲牛腩牛雜都好難差得去邊。牛腩入味，索曬啲汁。半肥瘦，有咬口，但亦夠淋。牛雜乾淨，無任何餲味，但牛味仍然好香，唔會漂到咩味都無哂。如果你唔想食粉麵，可以試下個東坡肉飯。小編老婆至愛。首先，肉夠肥，又炆到入曬味。第二，個汁送飯一流，加埋啲豆卜，只會令你食唔停口。另外，介紹埋杯冬瓜茶。坊間一般嘅冬瓜茶都甜到無朋友，但呢杯少甜，反而令冬瓜茶嗰種清涼，清爽感覺更加出，連怕甜嘅小編都愛不釋手。好簡單嘅飲品食物，但係卻帶俾你一種食完會掛住，會想翻去再食嘅味道。其實小編最鐘意，最想介紹俾大家認識嘅就係呢類好認真製作，又好有人情味嘅小店。真心，去試下啦。