金子半之助 (新都會廣場) (已結業)

本店位於日本橋既過江龍金子半之助香港開鋪都有幾年，剛剛開業時都試過幾次唔錯，今日再黎睇下水準有無變到。餐廳同其他天丼飯餐廳既唔同就係呢到採用日本特製高級胡麻油去炸天婦羅，用胡麻油製成的天婦羅芳香撲鼻及色澤會較深，麻油既香氣街外都聞到。餐廳人潮無以往剛開業時咁墟冚，坐得比舊時舒服，而且人潮小左，餐廳無咁嘈，可以靜靜的品嚐食物。當日嗌左松葉蟹天丼、江戸前天丼及迷你天丼拼稻庭烏冬。松葉蟹天丼，冬季係食松葉蟹既季節，一碗內有兩隻蟹腳、海老、小柱魷魚天婦羅、莢碗豆、海苔及溫泉蛋，配料份量都幾多，每啖飯都可以有配料去送。蟹腳都算大隻，咬落肉質爽彈，鮮甜但可惜蟹味唔算好濃；海老肉質都爽彈，唔會過老；最欣賞既係小柱魷魚天婦羅，即係以元貝仔及魷魚炸成既天婦羅餅，食落有油香而且啖啖肉，十分鮮味。江戸前天丼，與松葉蟹天丼配料一樣但蟹腳就換上星饅天婦羅，星饅足足有30CM長，食落肥美厚肉而嫩滑，食完好滿足。稻庭烏冬以醬油湯做底，上菜時店員會送上成個藥箱咁大既配料盒上枱，盒內有木魚花、昆布、蔥花、天婦羅碎及溫泉蛋，方便食客自己添加不同配料。配上迷你天丼食，又飽肚又可以試多樣食物，岩哂D心大心細諗唔到食咩的朋友。