洪祖師 (已結業)

Item: 洪祖師
Rating: 3
Author: 奧志雷

3.5

80 食評

味道

環境

服務

衛生

抵食

1883

上水

$50以下

台灣菜粉麵/米線

奧志雷

等級4

2.1K

帶著白松鼠狗定春要等門口唯一的摺檯，兩個單車大叔食完都唔捨得走，仲要慢慢嘆埋支煙，前前後後等左 15 分鐘有多！侍應無提供餐牌就離開不理，好采係門口已經諗定食咩啫。妹妹姐姐嬸嬸服務殷勤滿意，食得開心。

不見兩年刮目相看，從服務到食物質素都大躍進！四眼剷青哥哥非常有衝勁，渾身活力滿場飛服務有熱誠，收銀四眼叔叔就似乎有點遲鈍休悠黐笠笠。已不見以前著短褲著拖鞋頭髮油淋淋係廚房鋪面行出行入那位核突男，眼睛乾淨很多了！

芒果紅茶，愛嘆茶的我一定滿意，果酸帶茶香，不錯的選擇。檸檬柑吉，淡淡的酸，微微的甜，夠清爽消滯。荔枝紅茶，炎炎夏日透心涼，酸甜荔枝味果甜突出。茉香綠茶，透心涼順喉清新。冬瓜冰，十足十糖冬瓜味道，對我而言實在太甜。

台南滷肉飯，某次得一丁點梅菜滷肉完全唔合格，完全唔夠撈飯！嚕肉飯無嚕肉，眼測 1 % 肉鬆加 9 % 梅菜，完全唔夠撈飯，只靠油淋淋菜汁。油味重帶微微甜梅菜味無肉味。眼前份量較正常，咸香帶著輕輕甜味，不油而清爽，撈飯醒胃增食慾。另有款台南原味滷肉飯，有什麼分別呢？

台式滷水拼盤，滷水過咸呢！雞翼偏咸，幸好夠肥美。滷蛋居然係全熟，還以為係溏心。膠黏豬髀肉及腍啤啤大腸，沾點辣椒油能掩蓋丁點咸度，如果有酸醋就可以大幅度減輕咸度啊。手工水餃湯，重重胡椒味湯汁，韮菜餃除餃皮勁厚外，餡料爽甜多汁，芽菜爽爽不腥。

滷水雞中翼，第一次勁讚好食好食！滷水濃稠芳香不過咸，立立令緊緊包著每隻雞翼。肥美的雞皮彈彈滴著鳳脂，內裡白肉滑滑。高質肥美飽滿滑溜，清香豉油滷水味散發甜醬油味，肉嫩非凡不乾不霉。

台南鮮蝦卷，免強合格，有蝦味但死實不鮮，炸得香脆不足。台式三杯雞，油膩微暖雞丁，醃味濃濃有咬口略為乾硬，不辣而甜味霸道，撈上梅菜滷肉飯較舒服。

蒜蓉炒高麗菜，完全係油浸烚菜，水汪汪烚完撈上蒜蓉及大量油，毫無鑊氣，不能叫炒只能叫撈，試兩片滿口油要放棄。菜肉雲吞，皮厚凍冰冰，淋上混濁甜醬汁唔難食。

台式家鄉紅燒肉飯，五花腩層次分明，紅燒汁已完全滲入其中！豬皮豐彈，瘦肉鬆化，肥膏炆到啫喱化入口即溶，甘香撲鼻無得頂，完美融合連飯入口，襯到天衣無縫如虎添翼。

台式滷水雞髀飯，巨形雞髀一望傾心，色澤鮮明吸引，略甜的滷水雞皮包著結實白滑嫩肉，擘大口一咬一扯，連肉帶皮大舊撕出，搭上細細啖雪菜滷水撈飯，食到停不下來！點解舊豆腐黐線地好食！外層嚥韌香口滷水清香，裡面幼滑白雪雪熱燙燙豆香飄逸。將滷蛋搗碎，甘甜蛋黃與滑彈蛋白撈雪菜滷水飯，一樣美味絕倫。

紅燒牛三寶，牛腱軟綿不硬，牛筋黏滑極腍是我最愛的質地，牛肚金錢肚先爽彈震震。紅燒汁甜味清爽，三合一連雪菜飯一齊嘆，百般滋味在舌頭，豐富的質感與味道，無比的滿足！兩口子嘆台式滷水雞髀飯加台式家鄉紅燒肉飯再加紅燒牛三寶，幸福滿足夠飽夠飽！

溏心滷蛋，估唔到一份有兩隻，如果段隻計會更好。清新滷水味不嗆，可以突出主角溏心蛋味道，蛋黃黏黏漿漿，濃縮的甘甜蛋黃味尤其震撼，連啪兩隻濕濕碎，比十隻我，我要食十隻！

招牌擔仔湯麵，跟我幻想的完全不一樣！上海擔擔麵深深刻在心裡面，最後發現原來係我睇錯擔擔麵，點菜紙寫係擔仔麵，實在宿醉利害眼花花。我唔食芽菜架，而且勁生就更加唔食！雪藏熟蝦尾沒有生氣沒有靈魂，乾乾韌韌無蝦汁無蝦味。豉油清湯馬馬虎虎，水汪汪淡淡的，肉燥撈麵味道不太夾。嚥嚥韌韌似莜麵，有點黐牙不舒服。九轉大腸，轉左去邊？完全腍劈劈腸皮，味道單調咸咸的不喜歡。

豆腐肉燥撈米線，外觀感到怪怪的，撩一撩唔似手功麵喎！問問四眼仔原來不是我的，可否上菜時複一複單呢？可以避免不必要的錯誤及損耗，浪費時間金錢！您又要再煮過，我又要再等過！隔離潮興旺都會講聲牛腩麵、魚蛋粉、艇仔粥，確認無錯先會放低啦！

麻醬手撕雞肉撈手功麵，滿有誠意的雞絲，不是鞋烚烚的燙渣雞肉，真的蒸過拆肉香甜鬆軟美味無投訴。將洋蔥汁全部淋下更豐富更香甜！手工麵嚥韌彈牙黏黏的，掛著大量花椒粉麻醬滑嘟嘟大口大口地啜，暢快淋漓！其實麻醬香甜不辣，只不過灑下花椒粉，添上獨特麻痺感覺及香氣。

紫菜巨蛋貢丸湯，老闆都喝住叫走蔥，您條四眼仔掛住吹水照落可也！知道落錯蔥花都話知我照出貨，有無搞錯！您好采我放假心情好，我自己親手挑走！重胡椒味及蒜蓉味的滾燙高湯，還有陣陣紫菜味，煮理得宜飲得下。我唔食芽菜的，仲要有根就更討厭！抱著食家要有冒險精神都試試吧，讓熱湯浸多幾十秒，清爽多汁無腥無嗅，可以接受的。主角貢丸巨大過乒乓波，超爽結實！肉香霸道，肉汁噴出，甜到盡頭，無可爭辯的極品！

秘製豬頸肉，熱辣辣外層焦香微脆，肉質鮮嫩水潤肉汁滴滴，也不乏豬油。過肥的豬頸肉，使得嘴仔油淋淋。望清楚是什麼醬來的，再次都是泰式雞醬甜淋淋，不是任何炸物跟泰式雞醬就完美，配泰式海南雞酸辣醬或生蝦酸辣汁更天衣無縫更美味，現在您教我如果是好？剛好食剩大量雞絲麻辣醬，沾點試試，味道非常合襯無得頂，還減低油膩感覺。