吉壽日本料理 (已結業)

第一次食呢間放題，未去之前睇相已經覺得好吸引，原先book咗九點半入座，但係職員未夠鐘已經比我地入去，座位幾舒服， 一啲都唔迫，而且裏面所有嘅職員服務態度都好好，叫完嘢食唔使3,4分鐘已經到，速度好快。壽司嘅款式都算多，而且嘢飲嘅選擇都好多，極力推介佢嘅炒蟹，夠晒熱同埋味道唔錯！一啲都唔馬虎！而且好大隻！我兩個人食都叫咗三碟！唯一有少少不足嘅就係帶子刺身唔係太新鮮！其他刺身都好好，三文魚好肥美！值得一提嘅就係佢嘅甜品，有自助雪糕機！初初以為係雪糕原黎，原來唧出嚟係乳酪！有原味同埋蜜瓜味，仲有好多配料可以再落！有朱古力，糯米糍同埋啲醬等等。同埋要推介嘅就係佢嘅朱古力糯米糍真係好好食！裏便除咗有朱古力雪糕之外仲有啲朱古力醬喺裏面！服務質素好，嘢食又唔錯，所以會再返嚟食！