添飲咖啡館 (已結業)

時間回溯到今年四月，幾個朋友相約齊齊入粉嶺摘士多啤梨😋難得山長水遠入到粉嶺，又點捨得摘完即刻走呢？於是喺網上搵到呢間由昔日裁判法院改建的添飲咖啡店。這類型的文青風cafe通常都好多人，所幸當日等咗大約一個鐘就有室外位（lucky)。餐牌入面最吸引首選「肅靜咖啡」。睇到「肅靜」兩個字，立即令人聯想到法庭上的法官大人，實際上是用冷水接觸咖啡粉96小時，經長時間萃取，令咖啡少了些苦澀，多了些香濃味道。經過濾後加上青檸片同飲，入口順滑而不澀，帶丁點天然水果的酸味，相當提神。用嚟裝咖啡的樽身以顏料手繪而成，與別不同，打卡效果一流～朋友揀的「一路向前」更容易入口，由espresso tonic改良而成，特別之處係加入自製果汁，非常refreshing。