鬼滷 (已結業)

第5次黎鬼滷食，重點係其實真係次次都有唔同感覺，中間有1次係失望過，可能係師傅心情唔好掛（講笑je，可能一時失手掛）到第4次再比多次機會佢，又回復返好滿意既出品，甚至係服務（變本加厲），好太多太詳細啦講解，有咩特別新鮮野都推薦晒。好，正題。果晚係成10點先去，都仲爆晒場咁，好彩係去既途中打定去問同留位。首先佢推薦酒醉鮑魚，爽口彈牙入味。之後佢推薦條凍魚，魚肉滑到嚇親，咸味岩岩好，魚既熟度亦剛好，仲咁貼心見我地食完一面仲剪埋條骨唔使我反魚。我5次黎都必點：世一普寧豆腐，3個人食左2碟15件，唔使再介紹，必點既。蘭王蛋蠔餅，我最愛但係可惜中間果次失望就係因為蠔餅。不過今次改善左，蠔仲大隻左，正。滷水拼盤，唔同左啲，濃郁左味道但係唔係咸，唔好誤會，一樣好好食，尤其雞，鵝肉，鵝腸好好食。仲有飲品個罐好特別。簡單講，可以5次覆卓一定有原因，因為好好食，銅鑼灣黎講又唔算貴，可以一試再試。