上海廳1930 (已結業)

夠朋友飯聚，不幸地我又係最遲收工的一位，但幸運地我又唔使動腦筋點菜，而到達時剛剛好係全枱擺滿食物的時候。先先見到我最愛的涼拌海蜇，朋友仔真知道我心思。爽脆而且酸酸甜甜的海蜇實在開胃。至於小店的點心，賣相亦唔錯，而且夠晒熱辣辣。我比較鍾意小籠包，輕輕咬開就有滿滿的湯汁流出。口水雞帶點微辣，而且雞肉都幾嫩滑。呢個四小碟就可以一次過滿足晒我哋四個女人的願望，每一款都好精緻。糖醋魚塊就好適合餸飯，魚肉分明而且軟滑，表面的醬汁甜甜地，夠晒開胃。朋友仔亦介紹咗我哋食一款上海傳統美食，充滿鹹香的金華火腿沾上甜絲絲的蜜糖，別有一番風味。上海粗炒味道唔算好出色，但份量就非常驚人，四個人share都食唔晒。