Kachimushi

營業中

休息中

放假去開錦田，行過見到呢間門面好簡約嘅Cafe就諗住入去試吓，點知一試就好有驚喜。入到去職員安排咗舖頭入邊坐榻榻米嘅枱俾我哋，原來舖頭出面仲有一個好日式嘅打卡位，可以比客人自由出去打卡，我都影咗好多靚相。入咗呢間餐廳就真係好似去咗日本咁，完全係日本嘅風味。我哋一行兩個人叫咗一份和牛吐司、波特蘑菇吐司、黑松露蟹肉醬吐司同抹茶紅豆pancake。和牛吐司好友牛味，食落一啲都唔會硬，而波特蘑菇就真係好有驚喜，入邊嘅黑椒帶出咗蘑菇同黑松露嘅香味，推介大家試。黑松露蟹肉醬吐司都超出色，蟹肉醬好香，蟹肉醬好大碟，好味到可以全部食晒。最後甜品就係抹茶紅豆pancake，一上枱，就感受到熱辣辣新鮮整嘅感覺，pancake上面嘅雪糕同pancake食落有種冰火交加嘅感覺。而且pancake底好香蛋味，食落完全唔會太甜。估唔到錦田呢個地方雖然偏僻，但係都會有一間咁出色嘅Cafe。