炑八韓烤 (青衣城1)

營業中

休息中

話說今日同朋友諗食乜嘢，諗返起青衣城有間炑八，見未試過就想試吓佢個lunch，朋友之前有食過，都話幾好食。點知呢一試真係一生難忘。朋友嗌咗個烤牛肉蛋包飯$78有杯嘢飲，杯嘢話係果茶，點知淨係食飲到勁淡嘅菠蘿味冇乜茶味，好似開咗水咁，仲要成杯都係碎冰。個飯上到嚟凍嘅，好似冇整熱過直接攞上嚟咁。後面朋友仲要同我講返，食完之後肚痛。本人就嗌咗個韓式炒粉絲$68同樣係飲果茶。個粉絲上得有啲慢吹咗一次單之後大概等多5分鐘就出咗餐，但係見佢攞上嚟盤嘢都係熱嘅識出煙嘅就算啦。點知一放入口，好鹹！唔知發生咗啲咩事，請問廚師係咪手震？食咗兩啖已經咸到食唔落。嘢食講完，到環境。如題，我哋嗌完嘢食之後見到有隻大大隻嘅米奇由天花板跑咗落嚟，最後唔知去咗邊。朋友都有嗌「有老鼠」，相信店員都有注意同有聽到，但係佢哋嘅反應係好似習以為常咁，照樣佢有佢跑，佢有佢出餐。總之今次嘅整體用餐非常失望，如無意外都不會再光顧。