容龍海鮮酒家

營業中

休息中

今晚公司歡送幾位退休同事，就在屯門出名高級食府容龍海鮮酒家食晚飯，容龍真係不愧連續14年米芝蓮推介餐廳，記得早啲去參觀容龍嘅歷史，上埋天台睇大炮吖。容龍出名芝士焗開邊龍蝦，色香味俱全，芝士焗得香口，龍蝦肉新鮮爽口又彈牙。砵酒焗美國生蠔，一打開錫紙，香味四溢，生蠔焗完都好大隻，蠔邊微脆，蠔肉味香濃。豉椒炒大蟶子，大蟶子起肉炒青椒及洋蔥，蟶子肉厚及味道清甜，食得好方便。清蒸東星斑，廚師蒸魚時間啱啱好，唔會過熟，魚肉保持嫩滑，加上香蔥絲及特製蒸魚豉油，唔會過咸，更加突出東星斑嘅鮮味。蒜蓉粉絲蒸巨型帶子，熱辣辣上枱，帶子蒸得嫩滑，粉絲吸收了蒜蓉及帶子嘅精華，大家食到嘴舐舐。仲有容龍秘製焗燒鵝皇及爆炒薑蔥鮑魚煲，都好好味，掛住食，唔記得影相🤭蒜子上湯浸豆苗，可能浸耐咗少少，豆苗冇咁爽口。瑤柱蛋白炒飯，炒得很有鑊氣，清清淡淡都幾好食。