BriKetenia (已結業)

今日朋友生日，近觀塘返工，知道有間西餐廳唔錯，所以book定枱同個friend慶祝。一入到餐廳氣氛唔錯，燈光亮度適中，唔會過暗，其實真係好怕餐廳太黑，仲有就係音樂唔會過嘈，可以好好同朋友傾下計。講到主菜方面，呢間餐廳個set dinner 有不同款式，應該好岩唔同口味嘅人，就好似我朋友佢唔好牛肉，佢叫番呢間店嘅signature 西班牙黑毛豬豬扒。先講前菜，店家奉上嘅麵包配上特製蛋黃醬，真係好好味，我同朋友不知不覺食咗大半客，爭啲唔記得留肚食後面主菜！加上我㨂咗好吸引嘅法式鵝肝焦糖燉蛋，佢脆皮加埋混入鵝肝嘅燉蛋，味道濃郁香滑，果然係好正嘅前菜！講番我朋友嘅主菜，豬扒煎得香口粉嫩，加上配味獨特，果然係招牌菜。講到我就當然叫咗M6和牛肉眼扒啦！真係好好好好味！煎得外脆內香，一咬落去肉汁好重牛味，食到好感動。配上智利15年紅酒，夾到無得頂！今次真係好滿足，我真心推介呢間餐廳，下次節日要再同老婆食多次啦。