Camellia (已結業)

K11 Musem開張有一段時日，呢日同姐妹相約食brunch，正好有機會過黎閒逛。商場雖然帶著熟悉既味道，但格局、檔次都同K11大相逕庭。從地下樓層Muse Edition一入，轉左就見到呢間少女心滿分、一片粉紅既Cameilla。菜餚屬西日fusion，餐牌配有圖片參考，每道主菜都秀色可餐難以挑選，幸好有set menu五選一，大大縮減選擇時間。落單後幾分鐘前菜就送上，第一次品嘗油炸過既金針菇。菇體幼細，令口感無一般西餐炸蘑菇油膩，酥脆香口。戳穿蛋黃使蛋液佈滿金針菇，增加濕潤感，亦中和左鹹味同熱氣。港女brunch當然要配果茶，雖然加左蜜糖調味，但味道仍保有柑橘果香同微酸，唔會過分甜膩，正合我口味。牛肋排位置經長時間慢煮，非常入味，一入口充滿醬汁既洋蔥香。連中心軟骨部分都煮至黏滑稔軟，肉質鬆軟，一切即開。朋友單點既煎香茅脆皮豬扒，清而不油，外脆內軟熟，又不失豬肉獨有既結實口感，帶一點脂肪更添嫩滑，係我食過最美味既香茅豬扒。