會所1號 港灣皇宴 (已結業)

粵放題 $196 半任食中餐幾高質，六點入座，九點Last Order，可以食到十點半離座。基本每人「送」一隻鮑魚，半隻龍蝦，翅（或燉湯），半隻乳鴿同Movenpick雪糕（或芒果布甸）。限量食材雖然唔算特別出色，但可以接受。任點任食有32款前菜及主食，不過建議開頭唔駛點太多，因為基本送的四款限定食材上餐好快，其中乳鴿龍蝦又要趁熱食，食完再叫唔駛急。即使無飯落肚都肯定捧著肚走， 其實都試唔晒每款菜式，因為每碟份量幾大，以一枱四人分享食，今晚只係試左大概一半菜式，唯一伏伏地係四川口水雞，凍到結冰。我推薦滷水牛𦟌，丹麥叉燒，草莓蝦球，黑松露元貝炒滑蛋，柚子雞翼，椒鹽一口豆腐，乾煸四季豆及青瓜海蜇，真係有Encore！另外見到外甥女個兒童餐有個豐富定食盒，其中一格係黯然銷魂飯！有驚喜！今晚中秋長假前夕都坐唔滿半場客，四人限聚令下，小弟今年第一餐家族聚餐擺六圍，食完圍埋傾下偈都唔怕嘈到其他人。