Starò

營業中

休息中

見到近排喺啲社交媒體上面有好多好靚嘅片，就喺女朋友生日嗰日帶咗佢去食。佢哋啲食物嘅擺盤真係好靚，尤其是佢哋個星空蛋糕，加埋嗰個煙火效果真係超級適合呃like。但係講返食物質素就真係覺得麻麻哋。嗰日我訂咗佢哋個海鮮餐，主菜要咗一份羊一份牛。佢一開始個海鮮拼盤入面有四款生蠔，其中有兩款食落都係覺得好腥、唔新鮮隔籬枱甚至要求佢哋換過隻。主菜就按佢哋建議每份都係嗌咗五成熟，但係唔知佢哋個人手安排係好緊絀定係點，見到嗰碟嘢擺咗喺個出餐位好耐都未上到我哋枱度，結果去到我哋張枱度嘅時候已經凍晒。不過其他嘢都算係幾好食，尤其是佢個龍蝦湯都真係好香。另一樣嘢就係佢哋啲上菜速度。首先我哋坐低咗之後都等咗10分鐘先至有人問我哋揀乜嘢主菜，但係明明前面有好多嘢都係唔使揀可以直接上咗先。不過唔緊要，係我哋揀完主菜之後差唔多每一碟嘢都隔半個鐘先上。我哋6:00入座，食到8:30先至食到甜品。冇比較冇傷害，見住隔籬枱遲過我哋入咗，應該都係嗌同一set嘢，但係每一份嘢都早過我哋到。希望餐廳可以食物質素同埋上菜速度上面有改善啦，唔好浪費咗咁靚嘅擺盤同埋咁靚嘅用餐環境。