無肉食 (My Central) (已結業)

喺疫情影響下，唔少餐廳都改變左營運模式。無肉食就將自助餐變成放題，除左湯同糖水之外，其他食物都係落order。佢地仲響應環保，比支白板筆客人喺過左膠既餐牌上面落order。無肉食有四間分店，中環店係唯一一間做純素，作為vegan緊係要黎幫襯下啦！叫左好多輪野食，大部分都不過不失，但又未至於有驚為天人既感覺。叫左兩款包味道都係偏淡。薯仔杏鮑菇幾好食，有少少焦糖咁。見個薯仔杏鮑菇幾好食就encore，點知黎到得返薯仔，一舊菇都冇。廚房既同事可能要留意下！炸物有炸豆乳，就好似食炸鮮奶咁，vegan們一定要試！中湯同西湯都有，今次淨係試左西湯，料足唔錯。唔信邪再叫多次薯仔杏鮑菇，今日個比例總算正常返。甜品細細粒，唔怕食滯。個綠茶紅豆撻最出色，啲蛋糕仔普普通通。芒果河粉啲芒果唔夠靚，有啲酸。總括黎講不過不失，希望餘下三間分店都可以慢慢轉埋做純素，等我地可以唔洗睇標記就可以放心食。