Main St. Deli (已結業)

見到呢度有好多蛋糕選擇，特登約咗朋友嚟呢度試吓。前菜叫左兩樣，分別係水牛城雞翼，同埋蟹餅。雞翼個醬汁幾好食。但我更鍾意個蟹餅，雖然望落去份量唔算好大，但係係真材實料入邊全部都係蟹肉，加埋啲千島醬又開胃又夾。黎美式餐廳唔少得嘅梗係叫漢堡包。漢堡包有好多款，但其實都係睇你想要咩料係入邊。我哋就揀咗最經典嘅煙肉芝士漢堡。一嚟到份量都幾大，仲要好細心咁幫我地切開咗四塊。可能因為漢堡包太厚所以啲蕃茄生菜同煙肉都放左係側邊，食嗰陣要將佢放返入去，有少少唔方便。麵包鬆軟，漢堡肉厚身又有汁，唔會過熟，幾好味。最後就係我哋期待左好耐嘅甜品時間。蛋糕有好多款，件件都好大件。我哋叫左呢度最出名嘅芝士蛋糕。芝士蛋糕好大件，可以見到佢仲高身過個牙簽筒。蛋糕芝士味好重又香滑，餅底牛油味好香，非常好味。