池記 (已結業)

剛開完會，食個麵先返大埔啦。唔知幾多年無食過池記，好似四五年前九龍灣黃金衣蟹粥、雲吞蝦籽撈麵一役後就無幫襯過喇。朋友仔想食，無所謂。一坐底成枱都係醋，黐笠笠！好采阿姐擺位時都順便抺乾淨，嚇得我！坐得唔多舒服，好迫而且枱櫈貼到密麻麻。烏蠅飛黎飛去喎，雖然衛生麻麻，但傳菜既大嬸非常有禮貌，多謝前多謝後，好 warm，都唔好意思黑面啦。淨南乳豬手，冷盤黎既咩？骨多肉少唔熱又勁咸，仲有豬腳甲呀！好可怕！激劣！兩碗迷你雲吞麵加一碟淨豬骨，多謝二百五十蚊！咁經貴唔啱我地食啦。四周完全被強國人包圍，我地似乎去錯地方咯。雲吞麵走蔥走韮黃，都有多年年食過池記既雲吞麵喇，以前堅好食，但依家完全唔合格囉，只能評為唔難食。細細一碗仔，湯底淡而無味又唔香，雲吞爽口但豬肉少到食唔到，鮮味欠奉，唯一合格既只有彈牙鹼水麵。雲吞麵走蔥走韮黃，整碗麵都太淡，都要辣椒油救命，池記依舊無豉油供應，無緊要，淨渣都好。但係辣椒渣不香口只有微辣，咸咸地，算擺啦，唉。