麗姐廚房

營業中

休息中

又一餐 farewell 飯局，今次揀咗梁祖堯成日推介嘅麗姐廚房。呢度係少有嘅樓上中式素菜館，地方比想像中大，乾淨企理。我哋叫咗五個餸，最正係燒汁脆鱔，入面係菇類，外面蘸粉漿脆炸，再沾滿黑醋同糖漿味濃嘅醬汁，最後灑上芝麻，非常惹味。黑松露牛油果炒飯好大碟，炒得幾香，黑松露味道幾濃，不過牛油果非常少，幾乎食唔出味道。其他配料仲有蛋絲，甘筍粒，松子仁等，整體頗豐富。另一熱門之選香煎蓮藕餅面頭炸得好脆，入面就略嫌有少少“散修修”，唔夠咬口。至於三杯雞煲同乾煸四季豆，前者有大量我最鍾意嘅翠玉瓜，偏甜味，唔錯，後者則略嫌鹹咗啲啲，要送飯食。