Sky726

前菜平日自己好少叫生蠔食，怕太腥同埋唔新鮮，難得今次朋友心血來潮想食就比個機會佢。半打$200有找，仲可以試到兩件：愛爾蘭同美國種，都算係咁～食落口味偏清爽唔會太重，夠鹹鮮，淺嚐可以！不過份量比較單薄，如果肥美啲可能會仲正～小食朋友係食肉獸，怕只係叫主食唔夠，就叫多咗款小食，而佢二話不說就揀咗雞翼。本身諗住咁普通嘅嘢，好似無咩必要叫，上檯之後見到就改觀了。唔係睇餐牌都以為叫咗雞腿仔，外觀幾有趣，咬落十分香脆清甜，又多汁，啲肉唔會鞋。整體蜜糖味道好出，都幾甜，但同時蒜蓉味就無咁出了。如果有啲炸蒜片係面頭可能會更滋味！主食呢排諗住健康啲夜晚都盡量戒澱粉，所以兩個主食都揀咗肉類，一份魚一份豬。我一向鍾意食鹹中帶甜味嘅嘢，呢碟楓樹糖漿燒銀雪魚伴牛油大蒜就深得我心。先要讚魚嘅份量好多，遠遠已經聞到好香燒過嘅味道，食落糖漿有點焦糖化，更帶出獨特嘅甜味。魚肉質嫩滑多汁，有適當油份，好正！另外叫嘅係慢煮黑毛豬鞍扒配意大利黑醋汁及牛肝菌醬，黑醋汁一點點放喺旁邊，牛肝菌醬同啲菇菌一齊，唔鹹但係幾出味，唔錯。主角豬胺非常淋，重豬香，邊位係有啲肥但中和瘦肉部分覺得非常滋味！果然係王牌推薦款式，下次會叫兩份～