美利餐廳 (已結業)

標題有少少怪，點解咁美利的日與夜呢？！因為依間餐廳我幫襯過兩次，感覺好懸殊，我幫襯嘅兩個時段分別係早餐同晚餐。我上次食晚餐....佢好難食，好似以前啲港式茶餐廳煮西餐咁嘅質素；但今日食早餐，好似入咗第二間餐廳咁，質素好高！其實令我今日再次幫襯嘅原因，係因為佢係我gym room隔離，我想快快脆脆食完早餐上去做gym，所以就再次光顧，我等位嘅時候已經聽到有個女人同老闆講：「你啲早餐好好食！」我心諗，早餐周圍都差唔多，有冇咁誇張？！入到去我就叫咗個三文治，係好普通嘅三文治，真心食落都普通，你唔會覺得差、亦都唔會覺得好好。（後尾先發覺，我係叫咗全個餐廳最普通嗰個早餐）咁我朋友就叫咗個雪菜肉絲雞扒米，我就試咗一啖，真係好好食...佢個湯底同出邊唔同，應該係落咗好多材料去淆製，雞扒亦都好嫩滑跟住又聽到隔離枱個哥哥讚個早餐好食，我睇吓佢食咩啦～原來係雞扒豬仔包，大大件...成塊雞扒凸咗出嚟，好大塊。下次一定會試PS:點解佢早餐同晚餐質素可以差咁遠，到而家都係一個迷