新明發食家 (已結業)

呢排突然好鍾意食雲吞麵，今日放工之後就去咗廣福里嘅新明發試吓…其實呢頭確實有好多點心+麵嘅舖頭，因為見呢間門口成日都有條龍，所以決定一試。比起其他茶餐廳，呢間算係“市正”啲。有卡位，亦有啲裝飾咁。睇睇餐牌之後，當然係order番我想食嘅雲吞麵啦。其實呢度同其他茶餐廳差唔多，都係有碟頭飯、麵咁；不過原來呢度出名嘅係盅頭飯，等食期間不停有一大籠一大籠嘅盅頭飯同點心出爐，好多食客都係食呢兩樣嘢，食完仲要外賣添，下次一定要試吓XP麵到喇！嘩，加咗腩汁，比平時食開嘅深色。個湯味道好濃，但可能係因為我嗌咗多腩汁嘅關係，食落有少少喊。麵質彈牙，而雲吞亦真材實料，有鮮蝦，唔會有肥豬肉。最意想不到嘅係竟然連條菜都好淋，好入味，正！愛辣嘅我當然要加辣油啦！呢度嘅辣油都好食喎，夠辣得嚟又脆脆地，同熱辣辣嘅腩汁雲吞麵確實係perfect match ^^唔知點解總係覺得大埔啲麵舖特別好食，而且仲只係$19一碗，唔怪得咁多人幫襯啦！