鮮魚湯 (美樂花園商場) (已結業)

今日諗住同朋友出屯門碼頭搭船，見有餓餓地，一於搵下有咩好食啦！見到有間叫鮮魚湯，好似幾吸引咁。好，坐低睇下有咩好食先。鮮魚湯美味鍋米線，蕃茄湯飲落幾鮮甜，唔係飲落好假嗰種。米線彈牙滑身，雞肉調味剛剛好，入口唔會柴，有口感。麻辣魚腩，湯底麻香，辣味慢慢湧上嚟，送飯一流，配上芫荽增添香味，正！不得不提佢個魚腩煮得啱啱好，好滑，冇骨，而且魚味好濃但唔會腥。食完辣嘅嘢，飲返杯菊花蜜中和一下，即刻覺得冇咁熱氣。法蘭西芝士流心西多士，西多士切落好鬆軟，入面夾有芝士同火腿，點埋楓糖漿同牛油，外脆內軟嘅口感配上一層甜甜嘅糖漿外衣，一試難忘！