逸翠軒點心專門店 (已結業)

今個冬天都未食過雞煲，趁呢幾日涼左，就過左去長沙灣嘅逸翠軒食雞煲啦！餐廳位於青山道，鄰近長沙灣地鐵站，地點尚算方便。餐廳裝修都幾別緻，感覺好似酒樓晚市雞煲任飲任食每位都係$168，包左點心拼盤、雞煲、火鍋同任飲飲品，仲免收茶芥、免收加一服務費，好超值啊！先來左個點心拼盤，有燒賣、潮州粉果同鮮蝦菜苗餃。燒賣啖啖肉；鮮蝦菜苗餃好出色，晶瑩通透，皮薄餡靚！然後雞煲就黎啦！兩個人有半隻雞，份量都幾多，雞髀、雞胸、雞翼樣樣齊！雞肉軟滑入味，辣度適中，都幾香口！食到咁上下就可以加湯打邊爐，店員隨即奉上火鍋湯底同配料。火鍋配料拼盤都幾豐富，有肥牛片、豚肉片、鮮蝦、蔬菜、鮮魚片、雜錦丸類等等。豚肉片豬肉味濃郁；肥牛好軟腍，充滿牛肉香！各式丸類質素都不錯，最欣賞係當中嘅牛丸同豬肉丸，幾好食啊！總括而言，每位$168就有咁多野食，真係物超所值啊！