鳥羽名古屋料理 (已結業)

今日又過香港島同朋友飲下酒吹下水，朋友話依間居酒屋相當唔錯，一於book定枱試試。因為朋友已經嚟過所以食物就由佢話事。佢呢度清酒選擇好多，我哋對清酒認識唔深，就飲侍應推介既。佢好細心轉用壼上！甘口易入口，結果叫咗兩支。朋友話炸腐皮溫泉蛋好出名。好厲害，外邊炸得好脆，但竟然入邊嘅蛋係流心！雙重口感好食到不得了！上级刺身拼盤刺身真係睇得見好新鮮，處理得好好。池魚薄切刀工好，魚新鮮度爆燈，送酒佳品。炙燒和牛刺身Marbling 均勻細密，外層燒過牛味突出，配上酸酸甜甜嘅醬汁，完全唔覺油膩！一件接一件食唔停口。什錦雞肉棒串，一次過試咁多口味，啱晒我呢啲鍾意新鮮嘅人。雞肉入邊仲有雞軟骨，配埋生蛋黃，又滑又香，正！手羽先唐揚香口皮夠脆，調味亦都夠香口，不過就乾身咗少少，唔夠juicy。雖然呢度價錢唔算平，不過食物水準相當高，一定會再嚟。