鹿鳴春飯店 (已結業)

作為有名嘅舊式中菜館,呢度既裝修格局雖然比較古老,但係一啲都唔殘舊.鍾意懷舊嘅一定要來.侍應都有番咁上下年紀,一律恤衫西褲打煲呔,都係有學識嘅樣,行出街會畀人覺得係銀行經理.一坐低侍應就畀條熱毛巾你抹手.食午飯咋喎,而家已經好少有餐廳提供咁嘅服務.小食係花生蘿蔔粒,花生係濕嘅,好爽口,比起好多茶樓既鹹脆乾花生好好多,起碼食得出好濃既花生味.出菜唔快,都要等十幾分鐘.京燒羊肉先到,外面一層薄薄既脆皮,裏面嘅羊肉多汁到咇出嚟.羊肉上枱時仲會有碗醬汁,建議唔需要點汁,羊肉本身已經好好味,無謂用汁蓋過羊肉本身既美味.記住要趁熱食,我專登留低一件食完飯食,諗住可以走嗰陣時齒頰留香,但食完飯佢羊肉已經乾曬喇,呢個時候就算點乜汁都夠唔返.回鍋肉用青紅椒加京葱爆炒,回鍋肉本身唔在講,全部配菜都非常入味.回鍋肉食落唔肥,油份都唔會過多,味道濃得嚟同配菜好夾,用來送飯一流!撐得著自然淘汰既果然都係好嘢.