能記飯店

營業中

休息中

深井燒鵝聽就聽得多，但原來真正嚟食係未試過，四條傻佬即興來左深井，唔知邊間好食下就隨機入左能記🤣翻查資料原來能記係一間已經有60多年歷史嘅老字號，亦係少數仍然持有炭爐牌照嘅店鋪，令燒出嚟嘅燒鵝更加出色。慶幸坐低吹左陣水就有燒鵝出爐，二話不說order返隻，出爐鵝未見其形先聞其香，首先要讚嘅係火候控制得非常好，外皮燒得焦脆帶點荔枝木嘅煙熏味道，肉質鬆軟保持著淡淡嘅粉嫩顏色，燒多一刻、少一分時間都未必做到呢個效果，而鵝肉脂肪分佈均勻，令肉汁爆發嘅鵝肉滲透住陣陣鵝油香味。另外幾款小菜就不過不失，係椒鹽鮮魷比較差啲，調味欠奉只算是普通炸魷魚，不過無所謂吧畢竟燒鵝先係主角，最後多謝姐姐推介我地整返碗瀨粉，雖然瀨粉只是簡單地配上清湯冬菜，但真正作用係減低淨食燒鵝嘅油膩感，絕配絕配。