大一海鮮火鍋料理 (已搬遷) 新店位置

Daiichi Hotpot

4.5

4.5

196 食評

味道

環境

服務

衛生

抵食

|

8273

尖沙咀

$201-400

港式火鍋海鮮

178

5

2

happyduckling

等級4

2K

136

幾個由小學已經認識的朋友，數數手指已經接近40年，雖然現在各有各忙，但每隔兩三個月總會找個藉口碰頭吹水食餐飯，今次就揀了「大一海鮮火鍋料理」。近年開業的火鍋店裝修越來越骨子，可以選擇的火鍋配料也由以往的牛肉、羊肉、鯇魚腩 / 鱔片、各類餃 / 丸，升級至手切本地牛頸脊（近十幾年本地牛肉越賣越貴，靚牛頸脊價錢直逼、甚至貴過頂級美國安格斯牛肉）、和牛、各款游水海鮮，當然游水海鮮全部都是時價。是晚星期五，整間火鍋店座無虛席，裝修唔算豪華、但乾淨企理（講到靚裝修港式火鍋店，可以參見另一篇食評「豪食涮涮鍋」），只不過比較擠迫、樓底又唔夠高、環境又有啲嘈吵，可以的話，盡量揀靠近窗邊的四至六人卡座最理想。火鍋醬料款式的選擇唔算多，鍾意搞混醬的人會唔多滿足，但對於只要求豉油、辣椒、炸蒜蓉及XO醬的筆者已經非常足夠了。尚未齊人，先叫兩個香口小吃制五臟廟。椒鹽魚腐（$69）椒鹽豆腐、椒鹽九肚魚食得多，椒鹽魚腐第一次。魚腐即是魚肉膠混入豆腐蓉，然後吱成一粒粒，平常在魚蛋粉麵舖的魚腐都是蒸熟後再稍為炸香表面，然後放湯；面前這一碟炸魚腐其貌不揚，很懷疑是否好食。每一塊炸魚腐形狀不規則、表面完全陷下去，最貼切的形

更多

幾個由小學已經認識的朋友，數數手指已經接近40年，雖然現在各有各忙，但每隔兩三個月總會找個藉口碰頭吹水食餐飯，今次就揀了「大一海鮮火鍋料理」。

近年開業的火鍋店裝修越來越骨子，可以選擇的火鍋配料也由以往的牛肉、羊肉、鯇魚腩 / 鱔片、各類餃 / 丸，升級至手切本地牛頸脊（近十幾年本地牛肉越賣越貴，靚牛頸脊價錢直逼、甚至貴過頂級美國安格斯牛肉）、和牛、各款游水海鮮，當然游水海鮮全部都是時價。

是晚星期五，整間火鍋店座無虛席，裝修唔算豪華、但乾淨企理（講到靚裝修港式火鍋店，可以參見另一篇食評「豪食涮涮鍋」），只不過比較擠迫、樓底又唔夠高、環境又有啲嘈吵，可以的話，盡量揀靠近窗邊的四至六人卡座最理想。火鍋醬料款式的選擇唔算多，鍾意搞混醬的人會唔多滿足，但對於只要求豉油、辣椒、炸蒜蓉及XO醬的筆者已經非常足夠了。

尚未齊人，先叫兩個香口小吃制五臟廟。椒鹽魚腐（$69）椒鹽豆腐、椒鹽九肚魚食得多，椒鹽魚腐第一次。魚腐即是魚肉膠混入豆腐蓉，然後吱成一粒粒，平常在魚蛋粉麵舖的魚腐都是蒸熟後再稍為炸香表面，然後放湯；面前這一碟炸魚腐其貌不揚，很懷疑是否好食。

每一塊炸魚腐形狀不規則、表面完全陷下去，最貼切的形容就是一個洩了氣的氣球；唔知道係醃料原因抑或炸過了火，顔色金黃得來帶點瘀黑。總之，賣相輸哂。食落去卻是另一回事。由於新鮮熱辣辣油炸，魚腐本身又非常容易吸油，再加上上菜速度夠快，每一啖咬下去非常燙口。表皮香口得來有一點點煙韌，就好似炸鯪魚球的質感；中心卻非常腍滑（源自豆腐）、又有少少爽口（源自魚肉膠），加上濃濃的鹹鮮以及表皮的香口惹味椒鹽，估唔到幾好食。

相比之下，脆炸墨魚雲吞角（$69）就被比下去了。望落去有啲似炸雲吞，只不過食起上嚟雲吞皮脆得來很硬、唔夠鬆脆，明顯係雲吞皮太厚、唔夠薄。餡料方面捨棄鮮蝦、改用墨魚膠，原意係想搞搞新意思，只不過缺少了鮮蝦的鮮甜，只餘下墨魚膠的爽口彈牙，加上墨魚膠只有一小粒，份量唔夠多，及不上傳統的炸鮮蝦雲吞好吃。墨魚膠還是製造成墨魚丸烚下烚下或者炮製煎墨魚餅更為合適。

脆炸墨魚雲吞角

脆炸墨魚雲吞角

古月龍山醉雞鍋（全隻）（$189）半隻雞都要 $129，加上有五個大男人，當然叫夠一隻。湯底是清雞湯，主角是古月龍山花雕酒；由於有酒，所以加入了紅棗、黨參，去除寒氣。雖然送上來的湯底是凍冰冰的，但已經聞到濃烈花雕香味，估計花雕的比例不少，因為整個湯底都變成了花雕的淺啡色。將整隻斬件雞放入鍋內，衾蓋，等湯滾 ⋯⋯ 等待期間，有啲擔心酒味會唔會太過濃烈；而且只是九月中，天氣仍然算幾熱，這個時候食醉雞鍋會唔會太過補 ⋯⋯

古月龍山醉雞鍋（全隻）

古月龍山醉雞鍋（全隻）

湯滾了，先食一舊雞肉，花雕雞湯已經滲入雞肉內，咬落去有陣陣酒香，肉質也夠嫰滑彈牙。雞肉唔可以滾得太耐，否則會變得粗鞋，所以第一件事就是要將所有雞肉食完才開始打邊爐。酒精隨着滾湯揮發了不少，剩下的湯底就只有淡淡酒香，沒有酒精的苦澀；剛才的擔心原來是多餘的。

食港式火鍋，除非完全不鍾意食牛肉，否則此乃必定上榜的火鍋配料之一；所有火鍋店的餐牌內也必定有一欄專門推介各款牛肉，「大一」也沒有例外。今晚就揀了牛魔王拼盤（本地牛、牛胸爽、安格斯牛粒、牛脷）（$399）。雖然望落去幾大碟，但每款牛肉只有十片八片，都算幾貴；不過話說回頭，十幾年前開始，打邊爐食牛肉就開始變得越嚟越貴，所講嘅並唔係什麼日本和牛，只是來自中國內地的活宰本地牛肉也絕不便宜，最靚嘅頂級牛頸脊就更加貴，甚至貴過安格斯牛肉。

牛魔王拼盤（本地牛、牛胸爽、安格斯牛粒、牛脷）

牛魔王拼盤內的本地牛形容得唔夠貼切，應該直接寫明本地手切肥牛，雖然唔知道係什麼部位，但雪花紋夠多、又分布均勻，稱得上極高質素的本地肥牛。切得厚薄剛剛好、不會太薄，肉質柔軟、又保留適當程度的咬口；肉味濃郁，甚至有少少牛脂味道，只不過本地牛肉的牛脂略羶，不太好食，幸好未至於太嚴重，牛肉味可以掩蓋這陣微羶。

安格斯牛粒及牛脷同樣好食，只不過兩者的烚煮時間同樣很難控制。切成小方塊的牛肉粒不似得牛肉片只需焯十幾秒，反而需要烚較長時間，否則受熱不夠，牛肉粒的中心會殘留了生牛肉的煙韌；烚得太長時間又會引致肉質粗鞋。淥牛脷的情況及要求也差不多，太生會很韌、太熟會很乾硬。

牛胸爽到底是什麼部位，一直唔係好清楚，只知道係近幾年港式火鍋新興的本地牛肉刁鑽部位，據講係黏附著牛肋骨的一塊筋膜，雖然望落去白雪雪，但同脂肪一點關係都沒有。所以，淥熟之後，只會皺成一團、並沒有完全溶化。食落口也絲毫沒有任何牛脂羶、甚至沒有什麼牛肉味，只是有一點爽脆。個人口味寧取其他正式的牛肉部位。

五個大男人年紀都唔細，所以鍾情於傳統的火鍋材料，鮮打墨魚丸（$109）及鮮打海蝦丸（$109）就唔可以缺少了，什麼芝心丸、爆漿丸等等，實在比較難以給予信心，只不過估唔到每碟超過 $100 的丸竟然只有九粒。無論墨魚丸或海蝦丸的確夠大粒，食落去也夠彈牙爽口、但又唔會過分煙韌，足以證明沒有加入大量生粉漿。每粒丸亦充滿鮮味，墨魚丸在墨魚髎內有細細墨魚粒、海蝦丸在蝦髎內有細細粒蝦肉；雖然貴，但都算貴得有價值。

鮮打墨魚丸

鮮打海蝦丸

自制四寶餃（$79）一碟有四款口味，每款三隻，分别是鮮蝦雲吞、手製水餃、手製韮菜餃、潮汕魚皮餃，比較起手打丸類就抵食多了。由於有五個人，冇份食所謂潮汕魚皮餃，翻看所拍照片，似乎冇一款似魚皮餃，反而水餃做好似有六隻，是否廚房執料時候搞錯了？

自制四寶餃

無論鮮蝦雲吞及手製水餃皆有相當不錯的質素，兩者餡料除了最基本的全蝦肉之外，也有大地魚碎的香味；水餃也有加入木耳及筍絲。味道不遜於坊間一些高質素的雲吞麵粉麵店。

花樣油條（$69）是一款近幾年出現的新興火鍋配料，用港式油炸鬼作為基礎，塗在表面的餡料各適其適；「大一」採用了墨魚膠，再在表面舖滿一層蟹籽。店員好似話要淥兩三分鐘，原來唔係好夠時間；薄薄的蝦膠確實熟透了，但是油炸鬼仍然偏硬，湯底鮮味尚未完全滲入。經過幾次驗證，最後認為需要放在湯內滾差不多5分鐘，才能達到軟腍適中。

芝味響鈴（$59）叫了兩碟，因為實在太好食。每個響鈴的腐皮原材料夠薄，但又有很多層，所以做出來的響鈴非常大個又厚身。響鈴實在非常鬆脆、每一層腐皮也實在非常薄，夾起來已跌落不少碎片。喜歡保持鬆脆的話，放入火鍋滾湯內只需要拖幾秒；喜歡盡吸火鍋湯水，就要烚夠十幾秒，咬落去就會表層軟腍味濃（因為盡吸了湯水）、中心內層依然保持一點香脆口感。只不過實在食不出、也看不見任何芝士粉。如果所講嘅「芝味」係指製造腐皮的豆漿溝入了芝士粉、或者捲響鈴的過程中加入芝士粉，那就有點失敗了。

總體來看，這間火鍋店相當不錯，以材料質素加上位處尖沙咀，價錢收得貴一點也是可以理解的。

(以上食評乃用戶個人意見 , 並不代表OpenRice之觀點。)

分享
推介

已推介
檢舉

張貼

評分

味道

環境

服務

衛生

抵食

用餐日期

2017-09-15

用餐途徑

堂食

人均消費

$300 (晚餐)

推介美食