泰式燒王 (已結業)

一早就book咗位，所以聖誕節晚同男友大人去會一會，大概6:3x左右到達，只有一兩枱疑似泰籍人士嘅熟客，而我哋被安排坐喺開放式門口位，當晚都幾凍吓，不過一飲咗個冬陰公湯成個人都暖晒，個湯有少少偏甜，好濃好香，湯內蝦肉質爽甜，蝦頭爆膏，好滋味。男友大人話泰式生蝦冇蝦味，好一般，而且蒜片只得一兩片，講真唔夠蒜片夾埋一齊食，感覺真係差啲~ 一直期待嘅白灼螄奄就又鮮又甜又多汁(血水)，唔會太熟到硬的的(其實應該係半生熟)，我就食唔停口，但係男友大人話係鮮同腥之間喎，不過我個人就覺得超好味啦! 冇期望嘅蝦餅反而超好味，因為一入口就知佢冇加麵粉之類嘅嘢，啲蝦肉彈牙而且比較粗粒，明顯只有蝦肉，又香脆又滿口蝦肉香味。差不多7:xx，人開始越嚟越多....食到七七八八嘅我哋難逃被趕嘅命運，就係無嗱咩咩送張bill嚟...... 小店一貫作風...所以攪到我同大人急急咁飲埋嗰半支啤酒.....走人~