越色牛肉粉餐廳 (已結業)

我同另一個朋友都係十二月之星，兩位好有心嘅朋友仔揀咗呢度想同我哋慶祝，又可以聚吓傾吓計仔。餐廳地方頗大，相對顧客並唔多，算幾清靜，座位亦舒適，職員有禮，服務唔錯，食物都好味，價錢公道，開開心心咁傾計食飯，呢度好適合。越色精選拼盤，賣相精緻，蝦餅，春卷夠香口，越色蒸粉卷清清哋唔錯。越色酸辣扎肉鳳爪，因為我哋兩粒星星唔食辣，叫咗咁多款最辣係呢個，不過都幾開胃。蒜香炒椰菜仔，幾香，菜夠嫩。牛肉，雞肉串燒，普普通通，沙嗲汁幾惹味。紅咖喱菠蘿豬頸肉煲，配4件蒜茸包，我哋另叫一份薄餅點。一啲都唔辣，豬頸肉少而且太淋，味道可以。燒春雞釀香茅黃飯，職員推介，唔錯，飯夠香，皮薄無咩脂肪，雞胸略嫌鞋咗啲。上呢菜有少少笑位，我哋影完相後職員代勞切，切好有朋友問切完㗎喇，原來幫我哋切只係由皮裂開嘅位入多兩寸。食埋甜品，開開心心又一晚了。