十三姨酸菜魚 (粉嶺中心) (已結業)

粉嶺不停開新餐廳，但大多數係茶記、西餐果D，今次終於有間特別D嘅餐廳!!! 由開舖到而家，每日都有人龍。當晚一行四人，由於由朝食到晚，所以到左晚餐時間一D都唔餓，加上有個係小鳥胃，商討之下覺得二人餐已經夠食。二人套餐 $228 – 4餸2白飯2酸梅湯招牌酸菜魚(小辣)唔好以為盤大得個樣，其實料有唔少，魚、芽菜、酸菜、窩筍外、原來仲有水晶粉，如果我知有嘅話，就唔會另外加$18要個粉😂，因為有點過多。魚好滑，但魚味唔重，質地較鬆散；魚皮帶點腥，但可以接受；湯底夠酸，初初食唔覺得辣，但之後越食越辣。水晶粉係闊薯粉，好煙韌，但每條都痴到幾實，加上闊身，有D難夾。敗筆係酸菜好梅😲，應該煮左好耐，一D都唔爽脆。無骨口水雞好好彩係雞髀位，不過唔夠滑，肉質偏實。麻辣醬調味啱啱好；花生夠脆無油益味。秘製雞翼4隻炸粉唔厚，外皮夠脆，友人話好味。雞絲涼粉第一次食涼粉，大力夾佢會斷開，本身無乜味，全靠個麻辣汁，雞絲偏少，但整體味道唔差。呢度嘅酸菜魚同太二比，雖然有段距離，但身為粉嶺少有嘅酸菜魚，價錢平民，全日無加一，份量又多，地點方便，性價比咁高，當然吸引大眾。