裕鵝莊 (已結業)

原來深井燒鵝開到嚟尖沙咀，今日同朋友行街一於去試吓！招牌燒鵝例牌： 原本以為例牌燒鵝唔會好大份，點知原來份量一啲都唔小。呢個果然係招牌，必點！皮脆肉嫩，一咬落去啲油脂浸晒出嚟，但又唔會覺得太油膩，個皮有好香嘅炭燒味，脆卜卜，燒得恰到好處。至於鵝肉一啲蘇味都冇，啲肉好厚身。香煎蓮藕餅：呢個菜真係好好食，同一般蓮藕餅做法有少少唔同，係用蓮藕絲配以豬肉、鮮蝦同蝦米一齊煎成，一上枱已經聞到好香，因為材料豐富，所以食落特別有口感。呢度啲蓮藕餅煎得一啲都唔乾，啲肉汁能夠所係蓮藕餅入面，好Juicy！小炒王：有好多配料，有蝦乾海蜇魷魚等等，炒得好有鑊氣，送飯同配啤酒一流！陳皮紅豆沙桃膠、椰香鮮奶桃膠：食完主菜我同朋友都好想食糖水，呢兩款糖水好有驚喜。兩個款都好足料，有勁多桃膠！朋友食嘅陳皮紅豆沙嘅陳皮味超重，紅豆亦有做到起沙。至於我食嘅椰汁鮮奶，一嚟到已經聞到超香嘅椰奶味，加上入面桃膠好多，食完都覺得好養顏😆呢兩碗糖水真係為呢餐畫上完美句號！呢餐真係好滿足，兩個人食到好飽，仲要打包！值得一題係呢度啲裝修好新好靚，座位坐得好舒服，侍應服務又好。