新興棧食家

營業中

休息中

新興棧出左名食魚粥，鐘意食魚粥嘅大部份都聽過，好明顯係老字號，我細細個，幾十年前已經跟父母來過。講真，之前裝修過，都企理左好多。舊時太有特色，行過路過都驚跣腳，而家又乾淨左，加左冷氣，都唔會好熱，夏天我都接受到。後生仔就唔多嘅，佬味十足，捉埋另一半先肯來。不同魚嘅部位都有，魚片、魚腩基本野不少得，仲有魚卜、魚雲、魚骨、魚鮫、魚尾都有，嗜魚人士嘅佳音。仲可以配腰潤、牛肉都係出色。粥底生滾，自由配搭。又有白灼或者薑蔥煮今日另一半約左人，我就隻身前來，平日都一樣高朋滿座，不過支公好易搵到位。點左個魚腩滑牛粥，最鐘意點呢個，冇咩細骨，得正骨，食得安心D。成碗粥配料非常多，魚腩大大舊，都有五、六件，另有七、八片滑牛。跟埋生菜絲。碗粥有魚味，夠哂鮮味，唔會太稀又唔會太杰，粥底好綿，好味唔洗講識途老馬就知，薑絲、生菜等自取，仲有油炸鬼伴粥。其他例如爽滑魚皮我都好鐘意，仲有薑蔥魚腩等，又香又惹味。可惜今日得一條友。價錢見仁見智囉，我覺得值得，食個茶記都四、五十蚊啦。