Infinity Workshop Cafe (已結業)

上個禮拜同個朋友行開旺角，我哋就去咗食下午茶。我哋上網見到呢間餐廳有好靚嘅拉花，所以我哋就揀咗呢間嚟食下午茶啦。呢度環境都幾大嘅，可能係平日嘅關係，所以都唔係好多人，俾人感覺好舒服。咁我哋就每人叫咗杯嘢飲同埋叫咗兩個意粉。我叫咗個白松露油煎香煎深海魚柳意粉，佢個白松露味真係好香，一送到上嚟就聞到，魚柳煎得好香口，而且魚肉係好結實嘅，唔會鬆，意粉軟硬度亦都整得好好。朋友嗰個就係黑松露油炒鮮帶子虎蝦意粉，佢個味道明顯比我嗰個意粉濃郁啲，蝦都好爽口彈牙，帶子明顯兩邊煎個嘅，但係亦都唔係全熟，可以保存着帶子嘅鮮味。而我叫咗個杯係三眼仔鮮奶抹茶，賣相整得好靚，連個拉花都整得好靚。第一啖味道好重鮮奶味，但係整體來講都係抹茶味比較重，仲帶點苦澀。