小桃咖啡室 (已結業)

今日同朋友喺銅鑼灣行完街，想搵個可以坐耐啲嘅地方食飯傾吓計，所以就上咗嚟呢度！呢間cafe環境唔錯，有幾個露台位，一望出去就係時代廣場，但係夏天熱辣辣都係留返係室內啦！我地揀咗個特色二人餐，有餐湯或沙律，雞翼，招牌嘅豬肋骨，仲有意粉，甜品同飲品，好豐富！係等上菜嘅時候我哋拎咗2個board game黎玩，玩嘅時間過得特別快，不知不覺啲野食就黎喇！首先黎嘅係兩杯飲品，我揀左餐廳推薦嘅西柚沙冰，西柚味好岀，又唔會太酸太澀，岩曬夏天飲，而朋友話佢嗰杯夏日摩納哥(水果梳打)都唔錯！今日餐湯係白湯，入面有蜆肉，creamy嘅湯配埋蒜蓉包一流！長通粉沙律份量岩岩好，好多甜甜嘅粟米。蜜汁雞翼幾惹味，熱辣辣好味！之後就到卡邦尼意粉，醬汁好足夠好creamy，意粉煮得彈牙！最後上既ribs配薯條非常有水準，果然係得獎作品，ribs肉質軟林又多汁，香脆薯條醬汁非常出色，食到停唔到口，最後仲有個小泡芙做甜品。整體來講呢間餐廳都係有驚喜，滿足到個胃又可以玩game傾計，下次可以試下一大班friend黎玩！