菓之店 (美芳街) (已結業)

今日去葵芳同客傾完嘢，個客話帶我去社區會堂附近食芝士撈麵，原來係間甜品店。門口放咗個牌，大大隻字豬扒芝士撈麵$33，仲有雪糕或者糖水送。店內光潔明亮，裝飾帶點小文青，俾人一種舒服嘅感覺。既然客人推介芝士麵，梗係要試試啦，加多條司華力腸都係$39一碟麵大家分享，蒜香豬扒大大塊炸到表面金黃，內心軟腍濕䦞。正呀！司華力腸咬落去個皮脆卜卜，唔會腍啫啫。一定要講吓個秘製芝士醬汁，唔會好漏，同啲撈麵又好夾喎。糖水揀咗椰汁涼粉，仲加多個雞翼尖。涼粉個椰汁充滿椰皇味，原來係用椰皇水替代清水打椰汁，特別清甜，係用心經營嘅小店呀。雞翼尖係客人叫嘅，平常都唔會食嘅，基於禮貌就夾一件試試，噢...入口有道好特別嘅味道，微微辣，清清哋嘅感覺，好好食喎，食唔停呀，卒之食咗一半！嚟到甜品店，叫返個甜品食吓。鮮果皇子係將新鮮水果，全部放响椰皇裡面，另上椰皇水椰汁。水果有：西瓜、紅肉火龍果、士多啤梨、奇異果、芒果、香蕉、木瓜。全部都好新鮮，加埋特製椰汁，味道好夾又好食！正呀！估唔到小店甜品、撈麵都咁好食。