鍾菜 (已結業)

今年因為疫情關係，已經好耐無出過去堂食，而家舒緩些少，閉關咁耐，係時候出關透透氣。今日天氣唔錯，陽光唔算太猛烈，下晝同朋友嚟到赤柱行下，咁耐無嚟，大街靜咗好多，平日更加唔多人。黃昏時分，去海邊吹下海風，欣賞週圍大自然環境，真係幾舒服。之後，我哋去咗赤柱廣場三樓嘅鍾菜食晚飯。鍾菜係稻香集團旗下嘅一個比較高級嘅中菜館，價錢當然貴幾倍。我哋首先掃安心出行，再出示針咭先可入去。裏面環境可以，安排我哋坐兩人卡位，唔可以食住欣賞風景。平晚食客唔多，都幾清靜，相對侍應招呼亦唔算週到熱情。小桌上有個自動加水機，侍應俾咗包茶葉我哋，自己加入去個茶壺，屬自助形式，照收加一服務費。我哋兩個人揀咗新鮮菠蘿咕嚕肉同勝瓜雲耳炒雞球。菠蘿殼裝住啲咕嚕肉，旁邊係一片片嘅菠蘿肉，算係幾有特色，新鮮菠蘿做賣點，賣相係靚，但食落個咕嚕肉偏甜，肉又唔脆，菠蘿有幾塊好酸。創意食味揾隻超大嘅碟去上菜，餸就得少少，基本上符合少油少鹽要求，但食味又係一般。總結食物祇係一般，唔算特別出色，所以最後我哋都無叫飯後甜品。