探花 (已結業)

同好姊妹食生日飯，梗係要搵一間可以打卡嘅靚餐廳啦。上網睇到呢間食點心嘅好似幾靚，周圍都係花花，啱晒我哋呢啲花痴。佢連茶杯同埋茶壺都好似人哋hight tea果啲咁靚。首先開胃菜係呢個話梅車厘茄，絕對係心機菜嚟，因為首先要將車厘茄剝皮，再用話梅汁浸到佢入晒味，所以食落酸酸尾尾咁，好開胃㗎。之後係呢個清森蘋果叉燒酥，佢個外型已經好得意，綠油油啱晒呢個餐廳嘅主題。咬開都好鬆軟，之後就係滿滿叉燒。然後我哋仲叫咗黑松露腐皮卷，佢呢個黑松露嘅味道唔會話好燶烈，而係慢慢咁滲出嚟嘅香味，唔會蓋過晒其他食材嘅味道。另外呢個係煙燻素鴨，佢一上枱嘅時候已經好靚，因為一打開就真係會有啲煙燻出嚟。而食落嘅時候都有好強勁嘅煙熏味，佢個口感就好爽脆，因為中間分別係萵筍絲同埋蘿蔔絲。之後仲叫咗個蝦多士，佢個多士炸到脆卜卜，同餅乾一樣，好香口。之後再配埋佢呢個用蝦頭淆出嚟嘅醬汁，味道好香濃。另外我哋有揀咗個菠蘿咕嚕肉，佢呢隻咕嚕肉係冇骨嘅，所以粒粒都啖啖肉，而每一粒嘅size都啱啱好。最後我哋仲叫埋個豉油王炒麵，不過份量真係好大，完全食唔晒。但係佢個豉油王炒麵係用幼身鹼水麵，每一條都好入味同彈牙。