Boring?! (黃埔天地美食坊) (已結業)

餐廳位於在黃埔蔡瀾美食坊，印像中上一次嚟蔡瀾美食坊食飯係食詠藜園，都有好幾年前喇，今日喺同事嘅驅使之下舊地重遊，估唔到喺蔡瀾美食坊都有間咁有情調嘅西餐廳。松露野菌泡沫忌廉湯，忌廉湯一放上枱已經散發住好香濃嘅黑松露味，作為配角嘅多士，餐廳嘅製作亦都相當認真，面頭除咗蒜蓉同埋芝士之外仲烘得相當鬆脆，夾住個湯一齊食相當好味。香芒大蝦沙律，大蝦沙律賣相精緻，大蝦個子不少，特別鍾意佢除咗喺沙律菜上面放有芒果醬之外，仲有一粒粒嘅新鮮芒果喺隔離。德國脆皮咸豬手配酸椰菜及蜜糖芥末籽汁，廚師已經預先將豬手切開，食起上嚟非常方便，豬手個皮脆到無朋友，點少少蜜糖芥末子汁更加好味。美國肉眼扒配薯菜，肉眼扒一上枱見到個格仔碳烤網紋已經令人食指大動，牛扒嘅熟度揀咗 medium，廚師將火候掌握得好好，一刀切開係嬌嫩嘅粉紅色，牛味香濃，令人非常滿足；配菜有車厘茄、西蘭花、椰菜花同埋薯仔，不得不提薯仔經過走油處理，誠意十足。