八月小品 (已結業)

出黃大仙地鐵行幾步就到八月小品，非常方便。茶樓內部裝潢，古典雅緻，簡約明亮，整齊卡位或圓枱，令人坐得舒服。難得與家人歎茶，茶樓當然有早茶優惠，一個主食加兩個點心，只係$56，價錢合理。薑蔥牛柏葉爽口，醬汁少少辣，份外惹味醒胃。熱辣辣鳳爪排骨煲仔飯，未食已經香噴噴，排骨嫩滑，鳳爪鬆軟，配合豉椒嘅香味，一流。另一款揀咗三色腰豆糕，最上層眉豆，中間紅腰豆，底層係鷹嘴豆，顔色好吸引，晶瑩剔透，令人垂涎欲滴。咬落每層都有不同口感，總之通通都綿密幼滑，甜度適中，清爽可口。後加咗一款顏色及賣相令人食指大動嘅點心，一個蒸籠內裝住三個細蒸籠，分別有原粒帶子、鵝肝或原隻鮑魚放喺燒賣上，造型零舍吸引，餡料結實，用料精美，鮮味無窮。此外，點心紙仲見到有台灣美食，有機會必定再試。