金記冰室 (已結業)

今日呀媽唔煮飯，我地一家四口唸住求其去茶餐廳醫下肚，點知呢度晚餐唔係一般茶餐廳咁簡單，直程好似大時大節成班親戚一齊去酒樓食個啲套餐，但價錢卻好親民，佢地做緊個海鮮三寶優惠，一條海斑都係$88，仲好高水準。我地四個每人叫左一個晚市套餐，可以用優惠價試兩寶。魚蒸得啱啱好，骨位冇唔熟，但好滑。而另一寶我地叫左炒蜆，睇相應該都睇到好大粒，好厚身，冇沙，而豉椒都冇搶左蜆嘅鮮味。可惜如果我有多兩個弟妹，就可以叫埋最後一寶嘅避風塘炒蟹。唔緊要啦，會再黎食再試！講下晚市套餐啦，相比起兩寶就冇乜特別，不過我本身唔係好中意食太鹹太濃味嘅中菜，因為食慣媽咪健康住家飯，而呢度每碟味道恰到好處，又夠鍋氣。唯一美中不足就係碟椒鹽豬扒拼鮮魷，鮮魷炸粉太多。呢度海鮮咁好食，廚師師傅下次唔好咁重手呀。整體黎講，我好欣賞呢度嘅海鮮，其他都超越普通茶餐廳嘅水準。下次可以提議親戚過節黎食，代替平時去個啲酒樓。