爆丼丼 (已結業)

舖頭開張前已經有留意呢間餐廳，身為荃灣人都知o個個位置既食肆唔易做，但每次行過呢間舖都見到爆場甚至有人等位，想必食物質素應該唔錯，當然要抽時間試試啦。一行二人入到店舖望餐牌都有唔少選擇舖頭雖小但已經坐滿哂人，好彩咁岩位唔使等，Yeah! 望下牆邊，呢度既招牌菜應該係丼飯同拉麵。我簡左極上魚生丼（$148）而朋友就簡左北海丼（$128），等左5分鐘到就送到檯上，都好快手。極上魚生丼（$148）第一眼既感覺係賣相吸引，位量極多，兩個女仔都夠食！呢個丼飯有齊牡丹蝦、三文魚、海膽、帶子、油魽魚，全部都厚切又新鮮，小編特別鐘意海膽，味道唔腥，鮮甜味濃，下次一定要試下舖滿海膽既四重爆丼先得。隨餐仲附送大大碗麵豉湯，呢個餐性價比超高，值得一試!北海丼（$128）友人的北海丼則包括吞拿魚、吞拿魚蓉、帶子、油魽魚以及三文魚，魚蓉打得好幼滑，黏黏滑滑，再夾著青蔥絲，有著淡淡既草青味，好好味，其他刺身同樣油脂甘甜，入口即化，跟餐送可樂，食完超飽超滿足。埋單加一每人都係百五蚊，好味又夠飽，地點都方便，好開心荃灣有間咁高質既丼飯小店，真心值得推介！