你妳 (運通洋樓) (已結業)

路德圍貴為美食天堂，當然要試多幾間唔同餐廳，今日就約咗朋友去試呢間台式餐廳你妳～呢間餐廳以小清新風格作為裝潢主題，十分舒適。芋泥吐司作為佢地嘅招牌，一定要嗌一份試試～今次同朋友揀咗肉鬆芋泥吐司，一拎上手真係比份吐司辣親手咁款！仲要芋泥同肉鬆多到就嚟要逼爆份吐司，芋泥有淡淡芋頭味，好綿密細緻！肉鬆好鬆化，麵包好明顯有搽牛油烘過脆卜卜，十分出色～不過建議各位朋友仔一人食半份就好啦，因為要留肚試多幾款菜式～主食方面我地揀咗台式滷水雞扒魯肉飯便當，滷水雞扒好厚身，咬落去頗滑身，唔係好鹹味道適中。另外我地都點咗個芝士玉米蛋餅，個蛋餅係酥皮底，煎得非常香脆，中間嘅芝士就嚟爆出嚟咁！再配上佢個少少甜嘅醬汁，真係食唔停，差啲一個人食咗成份！本身仲想試佢地個芋圓，但食完以上嘅野食已經飽到食唔到，唯有下次再同朋友嚟試啦！