華嫂冰室 (蝦尾新村) (裝修中)

好耐冇嚟過華嫂食嘢，對上一次仲喺舊舖，今次新舖都係第一次嚟，華嫂啲嘢食唔使講大家都知好食，今次嗌咗三樣嘢食分別係招牌菠蘿包，豬扒雞翼蕃茄通粉，煎魚餅豬膶炒蛋公仔麵。首先嚟咗個招牌菠蘿包，說穿了就係菠蘿油加蕃茄加煎蛋，老實講，比起招牌菠蘿包，我更加鍾意食菠蘿油，嗰種冰火嘅感覺，牛油同菠蘿包嘅水乳交融令人久久不能忘懷🤤蕃茄湯底同以前一樣都係咁出色，豬潤亦都好爽嫩，煎魚餅非常香口，而且啲餸嘅份量好多！總括嚟講，華嫂就算搬咗新舖啲食物依然冇跌watt，而且有得泊車係非常之好，但值得留意嘅係同舊舖一樣，好大機會冇冷氣，因為冷氣位有限😂😂😂