樂湯雞麵館 (庇利金街) (裝修中)

正所謂：「落咁大雨，唔通連個天都唔鍾意我？」作為落湯雞，都有食好嘢嘅自由！行街遇著大雨，咪去樂湯雞轉換一下好心情！依間樂湯雞係佐敦都一段時間，咪以為淨係秋冬季先有咁多人捧場，連熱到傻嘅夏天都會有人等位就知佢殊不簡單！今次同朋友一齊變落湯雞，除咗會試佢地最出名嘅砂鍋花膠雞外，仲叫多咗個口水豬手。砂鍋花膠雞確實夠熱，不過味道方面可以再重手少少，食落口真係有啲淡之餘，亦都突出唔到雞味。至於入面嘅花膠，大家當然唔好諗住係咩特別花膠啦，不過都算有一定份量俾大家咬下，而且都煮得唔錯，唔會融哂落湯，亦唔會好似咬緊舊膠咁。口水豬手切好一件件上枱，都相當貼心，方便大家食。豬手夠腍，加埋夠香夠辣嘅紅油，啱哂鍾意食辣嘅朋友。佢仲會送多碗湯，俾大家解辣之餘，都唔怕食食下太乾。餐廳仲有藥膳雞、雲吞雞選擇，鍾意食滋補嘢嘅朋友真係可以考慮一下。而家都九月，一於搵埋屋企嘅老人家一齊去食番餐先！