咕滋咕雞 (葵興) (已結業)

作為一個喺葵青區長大嘅人，平時除咗去葵廣掃街之外，有時為咗食好嘢都會行遠少少😆 最近聽朋友講，喺葵興新開左間食台灣鹽水雞嘅小食店「咕滋咕雞」，前兩日專登帶埋個女去試吓，食物好有水準，啲員工都好有禮貌，相信我以後會成日行過去葵興買來食🤤今次我哋叫咗鹽水雞🐥套餐A同埋地瓜🍠薯條。套餐A可以揀雞胸腿各半或三隻雞全翼，另選三款配菜+洋蔥。我揀咗齋根、黑木耳同豬耳。 雞胸一啲都唔鞋，好有雞味，雞腿位置就好滑，兩種唔同口感加埋特別好食。齋根吸晒啲汁好正，黑木耳同豬耳都好爽口，所有嘢加埋非常夾。味道方面可以揀濃味、正常、清淡，今次我就揀咗正常，下次諗住試吓濃味應該仲正🤤地瓜薯條即叫即炸，熱辣辣脆卜卜，地瓜薯條甜甜地好特別，我女一開始接受唔到薯條係甜嘅，但係食食吓就同我講好好味，最後俾佢食咗大半包😂