林洪記

營業中

休息中

成日都好想去街市樓上打邊爐，見到個價錢又唔算好貴而且又有得任飲汽水，重點係都見到幾多人食，所以都想來試吓！呢度係主打食海鮮，而且每一個都好新鮮，款式都好多！唔想食海鮮嘅話，都可以選擇食雞煲之後打邊爐！但鍾意食海鮮嘅我，就梗係揀海鮮啦！ 個海鮮拼盤一上到黎真係嚇親我！超多種類而且每一款都好新鮮，好大隻！淨係講個鮑魚先已經活生生咁，我都係第一次見咁生猛嘅鮑魚！龍蝦都見到有好多膏，而且都係即開俾你，方便啲食！蒸起上嚟，肉質都好彈牙，而且蒸完之後，龍蝦嘅味都鎖住晒喺肉質入面！除此之外，仲有其他款式嘅海鮮，帶子、蜆等等，食得唔夠喉嘅仲可以加錢繼續食！呢度嘅蠔，亦都係任食，而且唔會係好腥個種，每次嗌嘅份量都俾得好多、好足！蒸完海鮮之後，仲可以打埋邊爐，除咗可以任食肥牛之外，亦都有唔同嘅丸類同菜選擇，魚皮真係好好食，好脆身，而且每一塊都好大塊！